Қорғалжың мемлекеттік табиғи-қорығы Қазақстанның елордасы - Астана қаласынан 130 км оңтүстік-батысқа қарай орналасқан. Қорық қызметінің мақсаты - табиғи кешенді сақтау және зерттеу, табиғатты қорғау идеясын насихаттау. Қорық Теңгіз-Қорғалжың ойпатында орналасып, көлемі 259,9 мың гектар жерді алып жатыр, оның 198 мыңы суайдындар. Жалпы алғанда қорық аймағы - кезінде бүкіл ойпатты толтырған ежелгі теңізден қалған екі үлкен көл Теңгіз және Қорғалжыңнан тұрады. Олар басқа да ұсақ суқоймалармен бірге балық пен құсы мол су-батпақты бірегей кешенді құрайды. Қорғалжың қорығында Қызыл кітапқа енген барлығы 32 құс түрі мекендейді. Қорықтың жануарлар әлемі 40 жуық түрді қамтиды. Осы жерде айбарлы жабайы қабандарды, жүйрік ақбөкендерді, борсықтарды көруге болады.

Қорғалжың қорығының бірегей табиғи кешені жер шарының ерекше қорғауға алынған аумақтарының тізіміне, Рамсар Конвенциясының А тобына енген. Сонымен қатар, осы аумақты ЮНЕСКО тізіміне қосу жоспарланады.